Anamongan ti Departamento ti Salun-at (DOH) ti panggep a pannakaipangato ti buis ti sopdrink ken aminen a ‘sweetened beverages.’
Kinuna ni Dr. Ma. Elizabeth Caluag, hepe ti Lifestyle Disease Prevention Bureau ti DOH, a suportaran ti DOH ti gakat ni Dip. Estrellita Suansing ti Nueva Ecija nga agpanggep a mangipangato iti buis dagitoy a mainum tapno matellay ti sobra a panagin-inum dagiti tattao kadagiti sopdrink ken kaaspingna a mainum.
Kinuna ni Suansing, autor ti House Bill 3365 a makadangran iti salun-at dagiti ramen nga aspartame ken caramel coloring kadagiti sopdrink ken ti corn syrup a maar-aramat kadagiti sabsabali pay a ‘sweetened beverages.’
Babaen met ti nasao a gakat, kuna ni Finance Secretary Emilia Soledad Cruz a makaurnong ti gobierno iti nayon a P10.77-bilion a buis iti tinawen iti singasing a pannakaipataw ti 10 a porsiento nga ad valorem tax kadagitoy a mainum.
(Naipablaak iti Bannawag, Septiembre 1, 2014 a bilang.)
No comments:
Post a Comment